Երեկ Նիկոլ Փաշինյանի կազմակերպած հանրահավաքը վարչական ռեսուրսի կիրառման գլուխգործոց էր՝ իշխանության բոլոր թևերի, ՏԻՄ բոլոր կառույցների, մարզպետարանների, գյուղապետարանների, դպրոցների, հիվանդանոցների, կոշիկի արտադրամասերի, վարսավիրանոցների համատեղ գալա-համերգ: Այս մասին Ազգային ժողովում հայտարարեց «Բարգավաճ Հայաստան» խմբակցության պատգամավոր Նաիրա Զոհրաբյանը.

«Հանվեցին անգամ բոլոր նիսյաների տետրերն ու մարդկանց այլևս նիսյայով հաց չտալու սպառնալիքի տակ բերվեցին հանրահավաքի: Իսկ իշխանության դուստր ձեռնարկության կարգավիճակ ստացած օլիգարխները մարդ մատակարարելու գործում սահմանեցին ստախանովյան ռեկորդներ: Ես երբեք չէի տեսել վարչական ռեսուրսի նման զարհուրելի օգտագործում, ինչն արվեց իշխանության մարտիմեկյան հանրահավաքի մասովկան ապահովելու համար»,-ասաց Նաիրա Զոհրաբյանը:

Պատգամավորի խոսքով՝ Նիկոլ Փաշինյանն այսօր անում է այն, ինչի դեմ տարիներ շարունակ պայքարել է որպես լրագրող եւ ընդդիմադիր պատգամավոր.

«Մարտի 1-ից 13 տարի անց իշխանությունը արցախյան պատերազմում մեր պարտությունը, հազարավոր տղաների մահը, անհետ կորածների և ռազմագերիների հարցը նշեց «դըմփ-դըմփ-հու»-ներով, Երևանի փողոցներով վուվուզելներով կրուիզ անելով»,-ասաց Նաիրա Զոհրաբյանը: