«Բարգավաճ Հայաստան» կուսակցությունն ընտրություններին մասնակցելու է միայնակ:

Այս մասին Armenianews.am-ի հետ զրույցում նշեց ԱԺ «Բարգավաճ Հայաստան» խմբակցության պատգամավոր Արտյոմ Ծառուկյանը:

«Բարգավաճ Հայաստանի»` ընտրություններին առանձին մասնակցելու որոշումը կայացրել ենք  մեր քաղաքական խորհրդի և տարածքային կառույցների քննարկումների  արդյունքում: Վարչապետի` մեր թեկնածուն Գագիկ Ծառուկյանն է: Հայաստանի ապագան մենք տեսնում ենք նրա գլխավորությամբ:  Նախընտրական շրջանում   մեր երկրում ստեղծված  այս ծանր իրավիճակի հետ կապված` ելքերն ու լուծման ուղիները կներկայացնենք»,- նշեց Արտյոմ Ծառուկյանը:

Նա նշեց` մինչև 2020 թվականի սեպտեմբերի 27-ի եղած Հայաստանն այօրվա Հայաստանը  չէ. այսօր իրավիճակը, պայմաններն ու մարտահրավերները բոլորովին այլ են, ուստի այդ ամենը հաշվի առնելով  է  ԲՀԿ-ն ներկայացնելու  իր տեսլականն ու ծրագիրը:

Արտյոմ Ծառուկյանը շեշտեց` այսօր ասպարեզ բերված կեղծ օրակարգերը, դիվիդենտներ շահելու այս կամ այն փորձերը նորություն չեն ԲՀԿ-ի համար, ընդ որում` նաև քաղաքացիների մեծ մասն է հասկանում` ինչ է կատարվում:

 «ԲՀԿ-ն նոր քաղաքական ուժ չէ, և մենք շատ լավ գիտենք` այդ կեղծ օրակարգերը, կեղծ ինֆորմացիաներն ու թիրախավորումները որտեղից  են գալիս: Ընդամենը պետք է հիշեցնեմ, որ ԲՀԿ-ի հետ խաղ անել չի կարելի: Ընտրությունների արդյունքները   կտան այս ամենի պատասխանը»,- ասաց Արտյոմ Ծառուկյանը` հավելելով` կեղծ օրակարգեր ձևավորելու փորձեր կատարողները  թո'ղ հանգիստ լինեն:

«Ընտրություններին ընդառաջ` քաղաքական հայտ ներկայացրած ուժերին կոչ կանեմ  ընտրապայքարին մասնակցել ազնիվ ու էթիկայի սահմաններում, զբաղվել իրենց գործով, ներկայացնել իրենց ծրագրերը` Հայաստանի ապագայի հետ կապված ու կեղծ օրակարգեր չձևավորել»,- եզրափակեց Արտյոմ Ծառուկյանը: