Հնդկաստանի բնակիչներին հորդորել են պաշտպանիչ դիմակներ կրել տներում, հատկապես, եթե ընտանիքում կորոնավիրուսի վարակակիր կա։ Այս մասին հայտնում է NDTV հեռուստաալիքը։

«Եկել է մեր տներում դիմակ կրելու ժամանակը։ Նախկինում մենք խոսում էինք տանից դուրս դիմակ կրելու անհրաժեշտության մասին, սակայն քանի որ վարակը տարածվել է, լավ կլինի, եթե սկսենք տներում դիմակ կրել»,-հայտարարել է պատվաստումների հարցերով վարչապետ Նարենդրա Մոդիի խորհրդատվական խմբի ղեկավար, բժիշկ Վինոդ Փոլը։

5 օր շարունակ Հնդկաստանում վարակման դեպքերի օրական աճը ռեկորդային ցուցանիշներ է գրանցում։ Անցած մեկ օրում ի հայտ է բերվել 352 991 վարակակիր։ Երկրում համաճարակաբանական վիճակի կտրուկ վատթարացման ֆոնին վարչապետը հայտնել է «կորոնավիրուսային փոթորկի» մասին։