Հնդկաստանում կորոնավիրուսով վարակման օրական դեպքերի թիվը հինգշաբթի՝ 6-րդ օրն անընդմեջ 300 հազարից ավել է, հայտնում է BBC լրատվականը և հավելում, որ զինված ուժերը խոստացել են շտապ բժշկական օգնություն ցուցաբերել։

Մի շարք երկրներ, այդ թվում՝ Միացյալ Թագավորությունը, Գերմանիան և Միացյալ Նահանգները պարտավորվել են բժշկական օգնություն ցուցաբերել Հնդկաստանին։ Մեծ Բրիտանիայից առաջին շտապ օգնությունը Հնդկաստան է հասնելու այսօր. դրանում ներառված է 100 օդափոխիչ սարք և 95 թթվածնի խտանյութ։ Այս շաբաթվա ընթացքում, ընդհանուր առմամբ, Մեծ Բրիտանիայից Հնդկաստան է առաքվելու 495 թթվածնի կոնցենտրատոր, 120 ոչ ինվազիվ օդափոխիչ և 20 ձեռքի օդափոխիչ, հայտնել է Նյու Դելիում գործող Բրիտանական բարձրագույն հանձնաժողովը։

Առողջապահության համաշխարհային կազմակերպության ղեկավարն ասել է, որ Հնդկաստանում իրավիճակը «հուզիչ» է։

Հնդկաստանում կորոնավիրուսի հետևանքով զոհերի թիվը հասել է մոտ 200 հազարի։ Վերջին 24 ժամվա ընթացքում գրանցվել է կորոնավիրուսով վարակման 323 144 նոր դեպք և վարակի հետևանքով մահացության 2771 դեպք։

Ավստրալիան մինչև մայիսի 15-ը դադարեցրել է բոլոր տեսակի թռիչքները Հնդկաստանի հետ՝ կորոնավիրուսային վարակի հավանական բռնկումների մեծ ռիսկի պատճառով։

Ֆրանսիան, իր հերթին, «էական բժշկական օգնություն» է տրամադրելու Հնդկաստանում՝ ներառյալ թթվածնի գեներատորներ և շնչառական սարքեր։