ԱԺ «Բարգավաճ Հայաստան» խմբակցությունից դուրս եկած, անկախ պատգամավոր Սերգեյ Բագրատյանն ընտրություններին իշխող ուժին միանալու առաջարկ է ստացել։ 

Լրագրողների-ի հետ զրույցի ժամանակ պատգամավորն ասաց, որ ոչ առաջին դեմքից, բայց «Իմ քայլ»-ի տարբեր գործընկերներից առաջարկ է ստացել՝ քննարկելու ընտրություններին միասին գնալու տարբերակը. «Քանի որ խմբակցության ղեկավար Լիլիթ Մակունցը հայտարարեց, որ մինչև մայիսի 10-ը որևէ նման հարց չի քննարկվելու, բնականաբար պետք է սպասել և դրանից հետո քննարկել»,-ասաց Սերգեյ Բագրատյանը։

Հարցին՝ քաղաքական այդ ուժի հետ տեսնու՞մ է իր հետագա աշխատանքը խորհրդարանում, պատգամավորը նկատեց՝ քաղաքական այն ուժի հետ ճանապարհ կգնա, որի հետ իր ծրագրերն առնվազն 70 տոկոսով համապատասխանում են. «Պետք է հասկանամ՝ այս քաղաքական ուժն արտաքին քաղաքական հարաբերություններում ինչ դիրքորոշում ունի, տնտեսական քաղաքականության մեջ ինչ դիրքորոշում ունի։ Մասնավորապես ինձ հետաքրքրում է տնտեսության զարգացման տեսլականը տարբեր քաղաքական ուժերի մոտ»։

Անդրադառնալով հարցին՝ արդյոք 3 տարիների ընթացքում «Իմ քայլ»-ի տնտեսական քաղաքականությունը բավարարել է իրեն, Սերգեյ Բագրատյանն ասաց. «Այդտեղ բավականին լուրջ բանավեճ ունենք։ «Իմ քայլ»-ի տնտեսական բլոկի պատգամավորների հետ բազմաթիվ բանավեճեր, քննարկումներ ունենք։ Ընդհանրությունն այն է, որ ցանկանում ենք ունենալ ազատ մրցակցություն, առանց մոնոպոլիաների տնտեսություն, իսկ տարբերությունն այն է, որ ես գտնում եմ՝ պետությունն ամեն դեպքում պետք է կարգավորող գործառույթ ունենա և իր գործիքակազմով օգնի, որ մոնոպոլիան վերանա»,-ասաց պատգամավորը։