Եթե որևէ արտակարգ իրադարձություն տեղի չունենա ու քաղաքական ուժերը հավատարիմ մնան իրենց որոշումներին, հունիսի 20-ին Հայաստանում արտահերթ խորհրդարանական ընտրություններ են տեղի ունենալու:

Դրա համար մնացել է մի քանի շտրիխ, մասնավորապես վարչապետի ընտրության երկրորդ տապալում, որը տեղի կունենա մայիսի 10-ին, ընտրությունների օրվա նշանակում:

Եթե ամփոփելու լինենք մինչ այս հնչած հայտարարությունները, կարող ենք արդեն որոշակի ամփոփում անել մասնավորապես այն մասով, թե ովքեր են լինելու մասնակից ուժերի առաջին համարները:

Սկսենք իշխող ուժից, այստեղ Նիկոլ Փաշինյանն անմրցելի է, ինչպես Հուսեյն Բոլթը: Իմքայլականները ոչ մեկ անգամ են հայտարարել, որ հենց Փաշինյանն է լինելու առաջին համարն ու վարչապետի թեկնածուն: Կարգախոսը՝ «Ապագա կա»:

Փաշինյանի մրցակիցներից է ՀՀ երկրորդ նախագահ Ռոբերտ Քոչարյանը, ով ընտրություններին մասնակցելու է Վահե Հակոբյանի «Վերածնվող Հայաստան»-ի և հին ու բարի ՀՅԴ-ի հետ, ինչի մասին հայտարարվեց երեկ: Դաշինքի անունը դեռ հայտնի չէ:

Առաջին համար՝ Ռոբերտ Քոչարյան։

Գործող իշխանության հաջորդ մրցակիցն է նախկին իշխանություն ՀՀԿ-ն, որն ընտրություններին մասնակցելու է Արթուր Վանեցյանի «Հայրենիք»-ի հետ: Այս որոշումը կրկնակի անակնկալ է, քանի որ «Հանրապետական»-ը մինչև վերջին պահը հայտարարում էր, որ չի մասնակցելու ընտրություններին, սակայն ի վերջո կայացվեց նման որոշում:

Առաջին համար՝ Արթուր Վանեցյան:

Այս երեքի հետ մրցելու է հավերժ 2-րդ ուժի տիտղոսը նվաճած ԲՀԿ-ն:

ԲՀԿ-ականներն արդեն բավականին երկար ժամանակ չեն մասնակցում ԱԺ նիստերին ու Գագիկ Ծառուկյանի որդու շքեղ հարսանիքում մի լավ ուրախանալուց հետո լծված են կայանալիք ընտրություններին պատրաստվելով, որն ի դեպ, կայանալու է նաև հենց իրենց ջանքերով, քանի որ Փաշինյանի հետ պայմանավորվածություն ձեռք բերած ուժերից մեկը հենց իրենք են:

Հիշեցնենք, որ հենց ԲՀԿ-ն ժամանակին ձեռք մեկնեց Փաշինյանին՝ նախ ջուր մատակարարելով, ապա նաև նրա թեկնածությունն առաջադրելով վարչապետի պաշտոնում:

Առաջին համար՝ Գագիկ Ծառուկյան:

4 ծանրքաշայինների հետ կփորձի արժանի պայքար մղել թեթևքաշային ԼՀԿ-ն:

Այստեղ ևս ամեն ինչ պարզ է. Թերևս բացի ԼՀԿ-ականներից (միգուցե նաև ոչ նրանք) որևէ մեկը չի հավատում, որ այս ընտրություններում հնարավոր է մատուցել նույն հրաշքը, որը մատուցեց Հունաստանի ֆուտբոլի հավաքականը 2004 թվականի Եվրոպայի առաջնությանն ու մեր հավաքականը՝ վերջին ամիսներին:

Պայքարը՝ հանուն մի քանի մանդատի, առաջին համարը՝ Էդմոն Մարուքյան:

Մյուս ուժերից թերևս կարելի է նշել միայն առաջին նախագահ Լևոն Տեր-Պետրոսյանի ՀԱԿ-ին, որը դեռ որոշում չունի:

Արթուր Մնացականյան