Հայաստանում ստեղծված վիճակը ոչ թե ճգնաժամային է, այլ աղետալի. մեր աչքի առաջ մեր հայրենիքը բաստուրմայի նման կտրում, տանում են տաշելով,- այսօր լրագրողների հետ զրույցում հայտարարել է ՀՀԿ խոսնակ, ԱԺ նախկին փոխնախագահ Էդուարդ Շարմազանովը։

«Ի՞նչպես կարելի է գոհ լինել մի իշխանությունից, որը բերել է Արցախի 75% կորուստ, 5.000 եղբայրների նահատակությունը, որը բերել է պարտություն, Հադրութի, Շուշիի, Թալիշի և Մատաղիսի հանձնումը: Երեկ էլ հայտնի դարձավ, որ թշնամին խաղաղ, մտել է եւ 3,5 կմ մխրճվել է մեր պետական սահմաններից ներս»,- հայտարարել է էդ.Շարմազանովը եւ ավելացրել. «Սրանք իրավունք չունեն կառավարել, սրանք կառավարության անմեղսունակությամբ են տառապում»:

ՀՀԿ խոսնակն արձանագրել է, որ երեկ՝ մայիսի 12-ին, ամբողջ իշխանությունը լծված էր հերքելու մամուլում տեղ գտած տեղեկությունները, որ թշնամին 3,5 կմ մտել է Սյունիք: «Իսկ գիշերը վարչապետ կոչվածը նշեց ՝ բա գիտեք, 3,5 կմ մտել են և իրավիճակը ճգնաժամային է: Վիճակը ճգնաժամային չէ, աղետալի է ու այդ աղետը բերել է Նիկոլ Փաշինյան անունով անձնավորությունը։ Մեր աչքի առաջ մեր հայրենիքը բաստուրմայի նման կտրում, տանում են տաշելով»,- ընդգծել է ընդդիմադիր գործիչը:

«Դեռ նոյեմբերի 10-ին ասել եմ, սրանք ինչքան մնացին, ամեն օր հայրենիքի կորուստ ենք ունենալու: Մի հատ նայեք, թե նոյեմբերի 10-ից հետո քանի գերի ունենք, որքան տարածքների կորուստ ունենք, քանի անհետ կորած ունենք: Այսօր իշխանության թիվ մեկ ֆունկցիան պետք է լինի քաղաքացիների եւ սահմանների անվտանգության ապահովումը: Ռուսն է մեղավոր, ամերիկացին է մեղավոր, ֆրանսիացին է մեղավոր, բոլորը մեղավոր են, բացի իրենցից: Տիգրան Մեծից մինչեւ Հուլիոս Կեսար բոլորը մեղավոր են: Իսկ ինչի՞ համար է իշխանությունը»,- ասել է ՀՀԿ-ի խոսնակը:

Նա անընդունելի է համարել ժողովրդի լռությունը, եւ նշել, որ, եթե ժողովուրդը շարունակի լռել, վաղը Երեւանում դուռը բացելու են, տեսնեն թուրքը մի տեղ թեյ է խմում:
«Այս ամեն ինչի միակ մեղավորը Նիկոլ Փաշինյանն է»,- հայտարարել է Շարմազանովը եւ, խոսքն ուղղելով Նիկոլ Փաշինյանին, ասել. «Դու որպես վարչապետ խի՞ ես աշխատավարձ ստանում: Եթե ռուսը պետք է պաշտպանի մեր անվտանգությունը, էդ փողը կտանք ռուսին»։

«էլ ինչի՞ ենք բանակ պահում, իրեն պահում, որ հազար հոգանոց շքախմբով ման գա՞՝ սնայպերների ուղեկցությամբ: Էդ սնայպերներին տանեիք դնեիք Սյունիքում»,- հայտարարել է Շարմազանովը: