Գազայի հատվածում վերահսկողություն իրականացնող պաղեստինյան ՀԱՄԱՍ շարժման «Իզզադդին ալ-Քասամ բրիգադներ» մարտական թևը հայտարարել է Իսրայելի հարավային քաղաքների ուղղությամբ նոր հրթիռներ ուղարկելու մասին:

Ինչպես հաղորդում է ՏԱՍՍ գործակալությունը՝ հղում անելով պաղեստինյան ռադիոկայանին, տեղի ժամանակով 18:00-ին (երևանյան 19:00) մի քանի հրթիռ է արձակվել Նեթիվոթ և Բեեր–Շևա քաղաքների ուղղությամբ: Ռադիոկայանի տվյալներով՝ ավիահարվածների նոր շարքը ՀԱՄԱՍ-ի պատասխանն էր իսրայելական կրակահերթի պատճառով զինվորականների և քաղաքացիական անձանց շրջանում վերջերս ունեցած կորուստների համար:

Ավելի վաղ ՀԱՄԱՍ-ի մարտական թևը հայտարարել էր Միջերկրական ծովում գազի հարթակի ուղղությամբ պայթուցիկներով համալրված անօդաչուներով ավիահարված հասցնելու մասին:  

Հիշեցնենք, որ Երուսաղեմում հուզումները սկսվել են մայիսի 7-ին: Արաբ երիտասարդների և ոստիկանության միջև բախումները բռնկվել են մայիսի 8-ի երեկոյան, այնուհետև շարունակվել՝ տարածվելով Տաճարի լեռան և Ալ-Աքսա մզկիթի տարածքում: Դրանք իրենց գագաթնակետին հասել են մայիսի 10-ին, երբ հրեաները նշում են Երուսաղեմի օրը:  Բախումների ընթացքում կան զոհեր և վիրավորներ, այդ թվում՝ խաղաղ բնակչության շրջանում: Իսրայելի բանակը հայտարարել Է, որ ոչնչացրել Է ՀԱՄԱՍ-ի հետախուզության հանգուցային դեմքերի, այդ թվում՝ ՀԱՄԱՍ-ի ռազմական հետախուզության անվտանգության բաժնի ղեկավարին ու նրա տեղակալին: