Իրավաբանական գիտությունների դոկտոր, «Բիզնես-դիալոգ» ՓԲԸ գլխավոր տնօրեն Ենոք Ազարյանն այսօր լրագրողների հետ զրույցում հայտարարեց՝ վերոնշյալ ընկերությունը զբաղվում է բիզնեսի վարկանիշը կամ տվյալ բիզնեսը վարողի վարկանիշը սոցիոլոգիական հետազոտությունների միջոցով պարզելու համար։

Այս անգամ էլ «Բիզնես-դիալոգ»-ի աշխատակիցները ռուս գործընկերների հետ միասին հետազոտություններ են անցկացրել՝ պարզելու՝ ո՞ր քաղաքական ուժերին են վստահում քաղաքացիները, ո՞ւմ են պատրաստվում իրենց վստահության քվեն տալ հունիսի 20-ին։ «1117 քաղաքացի է հարցվել Երևանում և մարզերում։

Հարցումներն իրականացվել են հեռախոսազանգի միջոցով և անմիջական։ Մեր իրականացրած հարցումներն իրականացվել են այնպիսի մեթոդաբանությամբ, որը Հայաստանում ընդունված չէ։ Այսինքն՝ մենք քաղաքացիներին չենք հարցրել՝ ում եք ընտրելու, անուններ չենք հնչեցրել նախապես։ Մեր դիտարկմամբ առաջին հերթին պետք է դրվի խնդիրը ու դրանից հետո ի հայտ գա անձը, որը կարող է լուծել տվյալ խնդիրը», — նշեց Ենոք Ազատյանը։

Նա շեշտեց՝ հարցման մեթոդաբանությունն այսպիսին է եղել․ քաղաքացիներին հարց է ուղղվել՝ ո՞ր կուսակցությունը կամ լիդերը կարող է մեր երկրում ապահովել ներքին ու արտաքին անվտանգություն, ստեղծել աշխատատեղեր և արժանապատիվ կյանք ապահովել քաղաքացիների համար։ Ենոք Ազարյանի խոսքով՝ հարցման այս մեթոդն ընդունված է Ամերիկայում ու Եվրոպայում։ «Ըստ մեր կատարած հետազոտությունների՝ առաջատարը ԲՀԿ-ն է։

1117 հարցվողից 409-ը նշել է, որ մեր երկրում վերոնշյալ խնդիրներն ի վիճակի է լուծել ԲՀԿ-ն։ Գագիկ Ծառուկյանը հաճախ է շփումներ ունենում քաղաքացիների հետ, հոգատար է, իսկ մեր ազգն ավելի հուզական է, ու հատկապես կայունացման հետ կապված՝ մարդիկ շեշտում են Գագիկ Ծառուկյանի անունը՝ նշելով, որ նա նաև տնտեսությունը կարող է զարգացնել և որպես առաջնորդ՝ կարող է իր կապերի միջոցով ներդրումներ բերել ու աշխատատեղեր ստեղծել», — նշեց բաախոսը։

Ենոք Ազարյանն ընդգծեց՝ ըստ իրեց կատարած հետազոտությունների արդյունքների՝ երկրորդ տեղում «Հայաստան» դաշինքն է, երրորդը՝ «Իմ քայլը», չորրորդը՝ «Պատիվ ունեմ» դաշինքը։

Ասուլիսի վերջում բանախոսը կարևորեց քաղաքական ուժերի աշխատանքը նաև նախընտրական քարոզարշավի ընթացքում, քանի որ կան քաղաքացիներ, որոնք դեռևս չեն կողմնորոշվել, իսկ նրանց պարագայում քարոզարշավը և նախընտրական շրագրերի գրագետ ներկայացումը կարող է արդյունավետ լինել քաղաքական այս կամ այն ուժի համար։

Հասմիկ Սարգսյան