Այս ընտրությունները յուրահատուկ են։ Այս մասին այսօր Երևանի Շենգավիթ վարչական շրջանում նախընտրական քարոզարշավի ժամանակ ասաց ՀՀ երկրորդ նախագահ, «Հայաստան» դաշինքի ցուցակը գլխավորող Ռոբերտ Քոչարյանը։

«Ցավոք այնպես ստացվեց, որ մեր ժողովրդի մի մասը դեռ շարունակում է վստահել մի քաղաքական ուժի, որը տապալել է ամեն ինչ»,–ասաց նա և նշեց, որ ուղղակի չկա մի ոլորտ, որը քայքայած չլինի։

«Մեր պարտքն է համոզել բոլորին՝ հարևաններին, ընկերներին, շրջապատին, որ այն քաղաքական ուժը, որը տապալել է ամեն ինչ, որը չի կատարել ոչ մի խոստում, չունի բարոյական իրավունք նույնիսկ մասնակցել ընտրություններին։ Ես միշտ գործի մարդ եմ եղել, բայց այնպիսի վիճակ է ստեղծվել, որ նաև խոսող մարդ պետք է դառնամ»,– ասաց նա և նշեց, որ  ժամանակակից աշխարհում խոսքի ուժը հզոր է։

«Փոխանցեք բոլորին, որ Հայաստան դաշինքը գալիս է ուժեղ Հայաստան կառուցելու համար, թռիչքաձև աճ ապահովելու համար, ձեր կյանքը բարելավելու համար, մեր երկիրը այս անհայրենիք մարդկանցից ազատելու համար»,–ասաց նա։