Ռուսներն ամեն ինչ կանեն, որ Ռուսաստանը մեծ տերություն լինի. Պուտին
Ռուսները գլուխ են խոնարհում Հայրենական մեծ պատերազմում զոհվածների և հեռացած վետերանների առջև և կանեն ամեն ինչ, որ Ռուսաստանը մեծ և հզոր տերություն լինի, հայտարարել է ՌԴ նախագահ Վլադիմիր Պուտինը:
Երեքշաբթի՝ Հայրենական մեծ պատերազմի մեկնարկի 80-ամյակին, Ռուսաստանի Դաշնության նախագահը մասնակցել է Կրեմլի պատի մոտ անհայտ զինվորի շիրիմին ծաղիկներ դնելու արարողությանը:
«Այստեղ՝ Հավերժական կրակի մոտ, մենք գլուխ ենք խոնարհում բոլոր նրանց առջև, ովքեր չեն վերադարձել պատերազմից, մեզնից հեռացած վետերանների առջև: Այսօր՝ Հիշատակի և սգո օրը, մեր բոլոր մտքերն ու զգացմունքներն ուղղված են նրանց: Ես համոզված եմ, որ մենք կպահպանենք պատերազմի մասին այս հիշողությունը, այս ճշմարտությունը։ Մենք անում ենք և կանենք ամեն ինչ՝ որպեսզի մեր երկիրը, մեր հայրենիքը միշտ լինեն մեծ և հզոր տերություն», – արարողությունից հետո ասել է Պուտինը:
Նա շեշտել է, որ ռուսները միշտ երախտապարտ կլինեն «անմահացած հաղթողներին»՝ նրանց, ովքեր կյանք ու խաղաղություն են նվիրել ապագա սերունդներին:
«Հավերժ փառք նրանց, ովքեր ընկել են իրենց հայրենիքի ազատության և անկախության համար: Հավերժ հիշատակ նրանց», – ասել է Պուտինը:
Դրանից հետո նախագահը հայտարարել է լռության րոպե:
