Հուլիսի 7-ին Հայիթիի սպանված նախագահ Ժովենել Մոիզի հուղարկավորությունը տեղի կունենա հուլիսի 23-ին: Այդ մասին հայտարարել է Կապի եւ մշակույթի նախարար Պրադել Էնրիկեսն ուրբաթ կայացած մամուլի ասուլիսի ժամանակ, հաղորդում է ՏԱՍՍ-ը:

«Հուլիսի 22-ին տեղի կունենա հրաժեշտի արարողությունը, հուլիսի 23-ին՝ հուղարկավորությունը»,-նշել է նա:

Նախագահ Մոիզը ստացել է մահացու վիրավորում հուլիսի 7-ին նրա առանձնատան վրա անհայտ անձանց հարձակման հետեւանքով: Հրազենային վիրավորում է ստացել նաեւ նրա տիկինը: Երկրի վարչապետի պաշտոնակատար Կլոդ Ժոզեֆը կոչ է արել բնակչությանը հանգստություն պահպանել՝ հավաստիացնելով, որ անվտանգության ոլորտում իրավիճակը գտնվում է ոստիկանության եւ զինված ուժերի վերահսկողության տակ: Մոիզի սպանության մեջ կասկածանքով բերման է ենթարկվել 23 մարդ՝ ներառյալ առնվազն 18 կոլումբացի: Ձերբակալվել է նաեւ ծագումով Հայիթիից ԱՄՆ երկու քաղաքացի: