Տոկիոյի Օլիմպիական ավանում բնակվող մարդկանց շրջանում կորոնավիրուսով վարակվելու առաջին դեպքն է հայտնաբերվել։ Այս մասին հայտնում է NHK հեռուստաալիքը։

Նշվում է, որ վարակվածը արտասահմանյան հավաքականի անդամ է: Միևնույն ժամանակ, հեռուստաալիքի աղբյուրների տվյալներով, վարակվածը մարզիկ չէ։ Թե որ երկրի ներկայացուցիչն է վարակվել կորոնավիրուսով, չի նշվում։

Ավելի վաղ վարակն արդեն հայտնաբերվել էր մարզիկների և թիմերի անդամների մոտ, որոնք Ճապոնիա էին ժամանել խաղերին մասնակցելու համար, սակայն դա տեղի էր ունենում կա՛մ օդանավակայանում ժամանման պահին, կա՛մ հավաքականների նախնական տեղակայման վայրերում: Սա առաջին դեպքն է, երբ վարակը գրանցվում է անմիջապես Օլիմպիական ավանում։

Մինչ այժմ կորոնավիրուս է հայտնաբերվել Իսրայելի, Ուգանդայի և Սերբիայի աթլետների, ինչպես նաև Նիգերիայի և Ռուսաստանի հավաքականների օժանդակ անձնակազմի մոտ:

Տոկիոյի օլիմպիադան պետք է անցկացվեր 2020 թվականի հուլիսի 24-ից օգոստոսի 9-ը: Համաճարակի պատճառով մրցումները տեղափոխվել են մեկ տարով, այժմ դրանք կկայանան հուլիսի 23-ից օգոստոսի 8-ը: Կազմակերպիչները որոշել են խաղերն անցկացնել առանց արտասահմանցի երկրպագուների, տեղի հանդիսատեսին նույնպես թույլ չեն տա մասնակցել Ճապոնիայի վեց պրեֆեկտուրաներում, այդ թվում՝ Տոկիոյում կայանալիք միջոցառումներին:

Հուլիսի 12-ից Տոկիոյում համաճարակային իրավիճակի վատթարացման պատճառով կրկին ուժի մեջ է մտել արտակարգ դրության ռեժիմը, որը կտեւի մինչև օգոստոսի 22-ը: