MegaNews.am-ը զրուցել է Արտակարգ իրավիճակների նախարարության փրկարար ծառայության տնօրեն Արմեն Գասպարյանի հետ՝ անդրադառնալով փրկարար ծառայության կողմից իրականացվող աշխատանքներին։

 

Խոսելով հրդեհների ու դրանցից բխող վտանգների մասին՝ Արմեն Գասպարյանը շեշտեց՝ տնտեսվարողները պետք է ունենան համապատասխան հնարավորություններ և հակահրդեհային առաջին արձագանք իրականացնեն։ ԱԻՆ-ը պետք է արձագանքի միայն դրա բարդանալու դեպքում։

«Շատ դեպքերում տնտեսվարողներն առաջին արձագանք չեն իրականացնում, և այդ պայմաններում մենք փորձում ենք արձագանքել, թեև դա այս կառույցի վրա դրված խնդիրը չէ։ Հասարակության մեջ կա տարածված մի կարծիք՝ եթե հրդեհ կա, ապա ԱԻՆ-ը պետք է արձագանքի, բայց ո՛չ, տնտեսվարողները պետք է նախ կանխարգելիչ միջոցառումներ իրականացնեն՝ ունենանալով համապատասխան միջոցներ, և այդ միջոցների կիրառումից հետո, եթե բարդ իրավիճակ է լինում, ԱԻՆ-ը պետք է արձագանքի։

Հաշվի առնելով այն փաստը, որ շատ տեղերում նախնական արձագանքի պայմանները տնտեսվարողների մոտ բացակայում են՝ մենք արձագանքում ենք ի սկզբանե, որպեսզի ավելի չբարդանա՝ չնայած դա մեր պարտականությունների տիրույթում չէ։

Արմեն Գասպարյանը շեշտեց՝ փրկարար ծառայության լիազորությունների տիրույթից դուրս է ստուգումների կատարումը, որպեսզի պարզվի՝ արդյո՞ք տնտեսվարողները ունեն հակահրդեհային համապատասխան միջոցներ։

Արտակարգ իրավիճակների նախարարության փրկարար ծառայության տնօրեն Արմեն Գասպարյանը անդրադարձավ նաև լողի սեզոնի հետ կապված վտանգներին, մասնավորապես՝ քաղաքացիների՝ ջրում խեղդվելու վտանգին։

«Բացի փրկարարական աշխատանքներից՝ մենք անհրաժեշտության դեպքում մասնագիտական ծառայություն ենք ապահովում նաև ամբողջ ավազանի տարածքով, այսինքն՝ լինում են նաև դժբախտ դեպքեր Սևանի այն հատվածներում, որտեղ մենք ծառայություն չենք իրականացնում, և եթե ունենում ենք կանչեր ու ահազանգեր, բնականաբար, արձագանքում ենք։ Այս տարի նույնպես արձագանքել ենք և դուրս ենք բերել մեկ քաղաքացու դի։ Նա խեղդվել էր այն հատվածում, որը մեր ծառայության վայրում չէր եղել կամ ծառայության վայրին մոտ չէր եղել՝ շատ հեռու տարածությունում էր եղել։ Մենք մեր ծառայությունները շարունակում ենք նաև լողալու սեզոնից դուրս. չնայած գերծանրաբեռնվածությանը՝ մեր ծառայողները արագ ու օպերատիվ արձագանքել են», — նշեց Արմեն Գասպարյանը։

Նա շեշտեց՝ այս տարի առաջին անգամ ծառայության ընթացքում կիրառվել են նաև ԱԹՍ-ներ, որոնք հնարավորություն են տալիս արագորեն հետազոտել, կոորդինատներ որոշել, ապա արագ արձագանքել։

Վերադառնալով հրդեհներին՝ Արմեն Գասպարյանը նշեց՝ փրկարար ծառայությունը զբաղվում է ահազանգերի արձագանքմամբ ու հետևանքների վերացման աշխատանքներով։

«Անտառային հրդեհների ու բուսածածկ տարածքների հրդեհներից խուսափելու համար փրկարար ծառայությունն իրականացնում է նաև կանխարգելիչ աշխատանքներ։ Այս տարի ևս տարբեր ԶԼՄ-ների ու համայնքների միջոցով իրականացրել ենք քարոզչություն, որպեսզի մարդիկ պահպանեն հակահրդեհային կանոնները։ Անտառային որոշակի տարածքներում կան նաև հանգստի գոտիներ, այսինքն՝ դեպի ատառներ մարդկանց մուտքն ու ելքն անխուսափելի է, մենք իրազեկումներ ենք իրականացրել՝ ցուցանակների ու ԱԹՍ-ների միջոցով, որպեսզի վերջիններս պահպանեն հակահրդեհային կանոնները։ Օգոստոս ամսին անտառային հրդեհների մասով իրականացրել ենք ուժեղացված երկհերթափոխային ծառայություն, որպեսզի առաջին հերթին կանխարգելիչ միջոցառումներ իրականացվեն, ինչը հնարավորություն կտար նաև հրդեհների առաջացման դեպքում արագորեն կանխել։ Այս աշխատանքները տվել են իրենց արդյունքները․ չնայած անոմալ շոգին՝ նախորդ տարվա համեմատ դեպքերի նվազում ունենք։ Անտառային տարածքներում՝ ներառյալ Երևանին հարակից անտառային տարածքներում։ Այս տարի 12 դեպք է եղել, նախորդ տարի՝ 19։ Այս տարի այրվել է 8,3 հեկտար տարածք, նախորդ տարի՝ 12,3», — նշեց Արմեն Գասպարյանը։

Պետք է շեշտել, որ կան այնպիսի տարածքներ, որոնց ռելիեֆն այնպիսին է, որ տեխնիկա մտցնել ուղղակի հնարավոր չէ, և նման դեպքերում ծառայողները բոլոր աշխատանքներն իրականացնում են ձեռքով՝ ուսապարկերով 20 լիտրանոց տարաներով բարձրանալով հրդեհի օջախ։ Նմանատիպ բարդ ռելիեֆային պայմաններ ունի Խոսրովի անտառը․ այս տարի նման դեպք եղել է, և ԱԻՆ ծառայողները կարողացել են հաջողությամբ հրդեհը տեղում մարել։

«Նման դեպքերում մեզ աջակցում են և՛ անտառտնտեսության ծառայողները, և՛ համայնքի բնակիչները։ Վերջին դեպքը, որ եղավ՝ Խոսրովի անտառում, Գառնի համայնքի ու հարակից տարածքների բնակիչները ակտիվ ու կազմակերպված ձևով՝ համայնքի ղեկավարի ղեկավարությամբ աջակցում էին մեր աշխատանքներին։ Դա մեր կողմից, իհարկե, նկատվեց, ուստի նախարարի կողմից խրախուսական պարգև հանձնվեց տվյալ համայնքի ղեկավարին», — ընդգծեց Արմեն Գասպարյանը։

Նա նշեց՝ հաճախ խոտածածկ տարածքներում է հրդեհ բռնկվում, ապա հետո հասնում անտառների ծառերին, ու փրկարար ծառայության աշխատակիցները իրենց առաջ խնդիր են դրել կանխարգելել խոտածածկ տարածքների հրդեհները․ այս տարի խոտածածկ տարածքների 2772 հրդեհի դեպք է գրանցվել, իսկ նախորդ տարի՝ 2771։

Արմեն Գասպարյանն անդրադարձավ նաև երկու մեծ աղբավայրերի (Նուբարաշենի ու Մասիսի) հրդեհներին։

«Խնդիրն այն է, որ աղբավայրերը շահագործվում են որոշակի տնտեսվարողների կողմից, որոնք պարտավոր են իրականացնել հակահրդեհային աշխարանքներ, որը պիտի լինի կանխարգելիչ միջոցառում, բայց, ցավոք, այսօր ունենք այսպիսի պատկեր։ Հաճախ քաղաքացիները անզեն աչքով դրա հետևանքներն են տեսնում։ Մասիսի աղբավայրում մենք օրեր շարունակ մեծ աշխատանքներ ենք իրականացրել և ծախսել բավական մեծ ռեսուրսներ՝ նյութական ու ծառայողների ներգրավման։ Մասիսից զատ՝ դեպքեր են եղել նաև Նուբարաշենի աղբավայրում․ դարձյալ տնտեսվարողի կողմից չեն պահպանվել հակահրդեհային կանոնները ու չեն իրականացվում կանխարգելիչ աշխատանքներ»,- շեշտեց Արմեն Գասպարյանը՝ ընդգծելով աղբավայրերում հրդեհների մարումը շատ բարդ աշխատանք է, ծառայողների կյանքի համար վտանգավոր։

Արմեն Գասպարյանը տեղեկացրեց՝ կենցաղային կանչերին արագորեն արձագանքելու համար այս տարի կիրառվել են նաև մոտոցիկլետներ, որոնք օգնում են արագ արձագանքել նույնիսկ խցանումների պարագայում։

Սեպտեմբերի 3-ին ԱԻՆ փրկարար ծառայությունը իրականացրել է իր մասշտաբներով ամենամեծ վարժանքները, որոնք այս ծառայության բաղկացուցիչ մասն են։

«Սեպտեմբերի 3-ին փրկարար ծառայությունը Լուսակերտի մեր ուսումնական բազայում և Արզնիի ձորում միաժամանակ իրականացրել է հատուկտակտիկական-ցուցադրական վարժանքներ։ Այս վարժանքը մնացած բոլոր վարժանքներից տարբերվում էր իր մասշտաբներով՝ ներգրավված անձնակազմով, տեխնիկայի քանակով, բացի այդ՝ առաջին անգամ օգտագործում էինք ԱԹՍ-ները՝ տարածքը ուսումնասիրելու ու արագորեն ինֆորմացիա ստանալու, այն վերլուծելու, ապա այդ ինֆորմացիան Ճգնաժամային ազգային կենտրոն փոխանցելու համար։ Այդ եռանկյունին մենք առաջին անգամ կիրառեցինք, բոլոր մտացածին պլանները, որոնք դրվել էին փրկարար ծառայության առջև, մենք ապահովեցինք 100 տոկոսով։

Փրկարար ծառայության ղեկավարման շտաբը, որը ղեկավարում է փրկարար աշխատանքները, առանց դեպքի վայրում գտնվելու հեռավար, ԱԹՍ-ների միջոցով տեսապատկերներին հետևելով մենք հեռավար փրկարար աշխատանքների կառավարում իրականացրինք։ Դեպքերի արձագանքման հեռավար կառավարման մոդելը մենք առաջին անգամ էինք փորձարկում և այն շատ արդյունավետ է, քանի որ միաժամանակ կարող է մի քանի դեպք լինել, իսկ աշխատանքի այս մոդելը շտաբին կօգնի միաժամանակ մի քանի դեպքի արձագանքել ու փրկարար աշխարանքների ընթացքը կառավարել», — ընդգծեց Արմեն Գասպարյանը։

Փրկարար ծառայության վերոնշյալ վարժանքներին ներգրավված են եղել փրկարար ծառայության բոլոր ստորաբաժանումները՝ քիմիական ծառայությունները, կինոզոլոգները, հոգեբանները, բժիշկները․․․Վարժանքներին ներկա են եղել նաև տարբեր երկրներում հավատարմագրված դեսպաններ, ներկայացուցիչներ, որոնք բարձր են գնահատել կատարվող աշխատանքները։

«Նմանատիպ վարժանքները շարունակական են լինելու։ Առաջիկայում նաև Բնապահպանության նախարարության հետ համատեղ՝ վարժանքներ կիրականացվեն՝ անտառային հրդեհների դեպքում համատեղ՝ գերատեսչությունների աշխատանքի կազմակերպման, սինքրոն աշխատանքի թեմայով», — նշեց Արմեն Գասպարյանը։

Զրույցի վերջում Արման Գասպարյանը խորհուրդ տվեց արտակարգ իրավիճակների բախվելու պարագայում խուճապի չմատնվել, ապա շեշտեց՝ գովելի կլինի, եթե քաղաքացիները ուսումնասիրեն համապատասխան գրականություն, որպեսզի արտակարգ իրավիճակների բախվելիս կարողանան ճիշտ քայլեր իրականացնել։

«Փրկարար ծառայությունը «911» հաղորդաշարի միջոցով ներկայացնում է՝ տարբեր իրավիճակներում ինչպես պիտի վարվեն մարդիկ՝ առաջին օգնությունից սկսած։ Գրականություն ուսումնասիրելով, մեր ծառայողների հորդորները լսելով, խուճապի չմատնվելով հնարավոր է ճիշտ կողմնորոշվել», — ասաց Արմեն Գասպարյանը։

Հիշեցնենք, որ երեկ սեպտեմբերի 21-ին Անկախության տոնի առթիվ, ծառայության ընթացքում ցուցաբերած արիության և նվիրումի` «Հայրենիքին մատուցած ծառայությունների համար» Արմեն Գասպարյանը պարգեւատրվել է երկրորդ աստիճանի մեդալով։

Ի դեպ, վերջինս երկար տարիներ աշխատել է ոստիկանության համակարգում․ հարցին՝ դժվար չէ՞ր անցում կատարել դեպի այս կառույց, Արմեն Գասպարյանը պատասխանեց՝ երկու դեպքում էլ ծառայություն է իրականացվում՝ յուրաքանչյուր կառույցում իրեն հատուկ սպեցիֆիկ աշխատանքներով։

Ըստ Արմեն Գասպարյանի՝ կարևորը կարգապահությունն է․ յուրաքանչյուր աշխատանքում դա տալիս է իր պտուղները։

Հ․ Սարգսյան