Հայաստանի կառավարությունն օրեր առաջ տարօրինակ մի որոշում կայացրեց՝ Հայաստանի Հանրապետության քաղաքացու անձնագրում այսուհետ որպես ծննդավայր կարող է նշվել ոչ թե Հայաստանը, այլ այն բնակավայրը, որտեղ նա ծնվել է: Համապատասխան օրենքներում փոփոխություն կատարելու մասին նախագծերն ուղարկվելու են խորհրդարան։ Չէր հասցրել հանրությունը մարսել այս առաջարկի ողջ անհեթեթությունը կամ գիտակցել դրա տակ թաքնված վտանգները, երբ հաջորդեց նոր հարվածը։

Ոստիկանությունը հանրային քննարկման է ներկայացրել նոր նախագիծ, որով նախատեսվում է փոփոխություն կատարել Կառավարության որոշման մեջ։ Ներկայումս քաղաքացու անձնագիրը տրամադրվում է 10 տարի վավերականության ժամկետով, բացառությամբ մինչև 16 տարեկանների, ինչպես նաև զինապարտ քաղաքացիների: Կառավարության որոշման նախագծով առաջարկվում է Հայաստանի Հանրապետության քաղաքացու անձնագրի վավերականության ժամկետը սահմանել 2 տարի: Երկու տարով սահմանափակվելու է նաև արտերկրում անձնագրի վավերականության ժամկետի երկարաձգման առավելագույն ժամկետը։ Ոստիկանությունը որևէ բաց հիմնավորում չի ներկայացրել՝ վկայակոչելով ընդամենը ինչ-որ գաղտնի որոշում։ Տևական ժամանակ էլ դադարեցված էր անձնագրերի տրամադրումը, իբր տպագրական խնդիրների պատճառով։ Այս ամենը լուրջ հիմքեր են տալիս կարծելու, որ իշխանությունը նոր և լրջագույն դավադրություն է նյութում ՀՀ քաղաքացիների դեմ։

Տարօրինակ չէ՞, որ երկու տարի անց հանկարծ բոլորս կզրկվենք անձնագրից։ Անձնագիրը ՀՀ սեփականությունն է, քաղաքացու ինքնությունը հաստատող միակ վկայականը, և ի՞նչ է ցանկանում անել Նիկոլ Փաշինյանի ազգադավ իշխանությունը՝ մեզ բոլորիս միանգամից զրկելով անձնագրից։ Այս իշխանությունը նույնիսկ 10 տարով տրամադրվող անձնագրերը ժամանակին չի հանձնում, ո՞ւր մնաց երկու տարին մեկ կազմակերպի այդ գործընթացը։ Հարցեր են, որոնք հստակ պատասխանի կարիք ունեն։ Թեև այդ պատասխանները վաղուց բարդ է ստանալ Նիկոլ Փաշինյանից։ Նա հերթական անգամ խուսանավելու է, իսկ ողջամիտ քաղաքացիների դեմ լարի զոմբիների իր բանակին։ Զոմբիներին, ի դեպ, անձնագիր երբեք էլ պետք չէ։