Դուք կարծում եք, որ փաստաթուղթը, որը պետք է հանգեցներ հրադադարին եւ հանգեցրեց, պետք էր ներկայացնել լայն քննարկմա՞ն, եւ սպասել, երբ մեր տասնյակ հազարավոր զինվորներ շրջապատման մե՞ջ էին։ Մեր իշխանությունն ամեն բան այնքան բաց է արել, որքանով որ դա հնարավոր էր։ Այս մասին  նոյեմբերի 1-ին ասաց ՀՀ ԱԺ նախագահ Ալեն Սիմոնյանը։

Նրա հավաստիացմամբ՝ ամբողջ գործընթացը բաց էր։ Նա նաեւ հավաստիացրեց, որ «Քաղաքացիական պայմանագիր» կուսակցությունը ժողովրդի թիկունքի հետեւում գործարք չի կնքել, ուստի ժողովուրդը ընտրությունների ճանապարհով տվեց իր գնահատականը։ «Ասում են, թե, իբր, պատերազմի ժամանակ ամբողջ ինֆորմացիան չէր տրամադրվում, բայց ոչ ոք չի ասում, որ մենք Հայաստանի Հանրային հեռուստատեսության եթերում ցույց ենք տվել անգամ քարտեզը, որտեղ նշված էին ե՛ւ մեր զորքերի տեղակայումը, ե՛ւ հակառակորդի զորքերինը։ Չգիտես ինչու այդ մասին չեն ասում։ Սա մեկնաբանության խնդիր է»,- նշեց խորհրդարանի նախագահը։

Ալեն Սիմոնյանը պարզաբանեց, որ տեղեկություն բանակցությունների մասին, նոր փաստաթղթերի ստորագրման մասին չունի, չնայած ԶԼՄ-ներում քննարկվող տարբեր վարկածներին նա ծանոթ է։ «Ելնելով իրավիճակից՝ որքան բաց է իշխանությունը, որքան ավելի շատ տեղեկություն է իշխանությունը տրամադրում, այնքան ավելի լավ կլինի ապագայում աշխատել եւ բանակցություններ վարել։ Ինչպես տեղեկացրել է Հայաստանի արտաքին գործերի նախարարը, անգամ հանդիպման մասով այս պահին նախաձեռնություն չկա։ Ընդհանուր առմամբ, ինֆորմացիան տրամադրված է։ Այլ տրամաբանություն նոյեմբերի 9-ի փաստաթղթից եւ հունվարի 11-ի պայմանավորվածություններից դուրս չի առաջադրվել եւ չի առաջադրվում։ Շարունակվում է այդ նույն տրամաբանությամբ։ Նոյեմբերի 9-ի, հունվարի 11-ի տրամաբանության մեջ որեւէ իրական նորության դեպքում հանրությունը, բնականաբար, տեղեկացված կլինի։ Որեւէ փաստաթղթի մասին ինֆորմացիա ես չունեմ»,- ամփոփեց ԱԺ նախագահը։