Կառավարության այսօրվա նիստում որոշում ընդունվեց՝ Ազգային ժողովի նախագահ Ալեն Սիմոնյանի համար 90 մլն դրամ արժողությամբ BMW 750Li xDrive LCI դասի ծառայողական մեքենա ձեռք կբերվի։ Վերոնշյալ որոշման նախագիծն ընդգրկված էր չզեկուցվող հարցերի փաթեթում։

Ըստ որոշման նախագծի հիմնավորման՝ ԱԺ աշխատակազմի կողմից իրականացվում է Ազգային ժողովի նախագահին սպասարկող (BMW 750Li 2011թ արտադրության) ծառայողական մեքենայի պետական գույքի կառավարման կոմիտեին հանձնելու գործընթացը, քանի որ նշված մեքենայի ընթացիկ տեխնիկական սպասարկումը դարձել է ծախսատար, և դրա շահագործման ու պահպանման համար ֆինանսական միջոցների հատկացումները այլևս արդյունավետ ու նպատակահարմար չեն։ Գնումը կիրականացվի Ազգային ժողովին 2021 թվականի պետական բյուջեով նախատեսված հատկացումների վերաբաշխման արդյունքում տնտեսված ֆինանսական միջոցների հաշվին։ Որոշման նախագծով՝ գնումը կատարվելու է պաշտոնական ներկայացուցչի ավտոսրահից։

Ըստ նախագծի հիմնավորման՝ այդ ավտոմեքենան գնելու «պահանջը տվյալ պահի դրությամբ համարվում է հրատապ»:

Ինչպե՞ս ստացվեց, որ այսպիսի խնդիրներ ունեցող երկրում Ալեն Սիմոնյանի համար ծառայողական ավտոմեքենա գնելը «հրատապ» է․․․

Անդրադառնալով այս հարցին՝ MegaNews-ի հետ զրույցում ԱԺ նախագահի մամուլի խոսնակ Ծովինար Խաչատրյանը նշեց․ «Հրատապության վերաբերյալ որևէ հավելյալ տեղեկատվություն, քան պաշտոնականն է, չեմ կարող ներկայացնել։ Միևնույն ժամանակ կարող եմ ասել՝ այս հարցը Կառավարության այսօրվա նիստում է քննարկվել, բայց հարցն օրակարգում եղել է վաղուց՝ երևի պարոն Սիմոնյանի՝ ԱԺ նախագահ նշանակվելուց առաջ, կամ այդ ընթացքում, ուղղակի հարցը նոր է մտել օրակարգ»։ Ծովինար Խաչատրյանն ընդգծեց՝ Ազգային ժողովին 2021 թվականի պետական բյուջեով նախատեսված հատկացումների վերաբաշխման արդյունքում խնայված ֆինանսական միջոցների հաշվին։ Հարցին՝ բայց մի՞թե ավելի կարևոր խնդիրներ չկային, որոնց լուծմանը կարելի էր ուղղել այս խնայված գումարը, Ծովինար Խաչատրյանը պատասխանեց՝ այդ հարցի հասցեատերը ինքը չէ․ ԱԺ աշխատակազմն է որոշում գնումների հրատապությունն ու հերթականությունը։

Մեր խմբագրությունը գրավոր հարցում կուղարկի ԱԺ աշխատակազմ, ու առաջիկայում մեր հրապարակումներում կներկայացնենք նաև այն պարզաբանումը, որը կներկայացնի ԱԺ աշխատակազմը։

Հետպատերազմյան երկրում, երբ մեր հայրենիքի առաջ այսչափ խնդիրներ են ծառացել, երբ մեր զինվորները մեր սահմանն են հսկում այնպիսի պայմաններում, որոնց մասին խոսելն անգամ շատ ցավալի է, որոշում է կայացվել «հրատապ» նման շքեղ ավտոմեքենա գնել։ Համացանցում երբեմն հայտնվում են կադրեր, որոնցում երևում են, թե որոշ վայրերում ինչպիսի վատթար պայմաններում են գտնվում մեր զինվորները։

Ամիսներ առաջ համացանցում հայտնված վրանի նմանվող, բայց և վրանից տարբերվող կադրերը շատերն են հիշում․ այդ պայմաններում՝ ցրտին մեր հայրենիքի պաշտպաններն են ապրում։ Պատերազմում վիրավորում ստացած ու հաշմված բազմաթիվ տղաներ այսօր սպասում են՝ հուսալով, որ մի օր հերթ կհասնի իրենց և իրենք էլ բուժսպասարկում կստանան․ խնդիրն այն է, որ «պետպատվերը սպառվել է»։

Մեր տղաները պիտի սպասեն, ստացվում է՝ այս խնդիրը հրատապ չէ։ Ընդ որում, այսպիսի իրավիճակում հայտնված հայրենիքի պաշտպանները քիչ չեն։

Լրատվական կայքերում հաճախ են հանդիպում նման ցավոտ վերնագրեր․ 

2019 թ-ին Փաշինյանի համար ձեռք բերվեց երկու զրահապատ ծառայողական ավտոմեքենա, հետո էլի՛ մեքենաներ ձեռք բերվեցին իշխանական թիմի ներկայացուցիչների համար։ Ժամանակին, երբ Նիկոլ Փաշինյանը պատգամավոր էր, կոշտ հայտարարություններ էր ունենում՝ ծառայողական ավտոմեքենաների հետ կապված։  «Հայաստանի Հանրապետությունում պետք է 30-35 ծառայողական մեքենա լինի՝ հատուկ պահպանության ենթակա պաշտոնյաների համար»․ սա բառացի մեջբերում է 2015 թվականին ընդդիմադիր պատգամավոր եղած Նիկոլ Փաշինյանի ելույթից։

 Իսկ այսօր ծառայողական ավտոմեքենաների թիվը բազմապատիկ անգամներ ավելին է այն ժամանակ պատգամավոր եղած Փաշինյանի նշած թվից։ Ծառայողական ավտոմեքենաների մասին հաճախակի խոսող ընդդիմադիր Փաշինյանը ժամանակին խոսելով այդ ամտոմեքենաների մասին՝ նշում էր՝ «Ինչ-որ երիտասարդներ Երևանի կենտրոնում ճռռիկներ են անում այդ մեքենաներով» 

Տեսնես այսօր Երևանի փողոցներում և այլուր ծառայողական մեքենանորով «ճռռիկներ անողներ» կա՞ն․․․

 

 Հ․ Սարգսյան

 

Սառեցված պետպատվեր․ ինչո՞ւ է անվճար բժշկական օգնությունն անհասանելի - CIVILNET

civilnet.am