Ելիսեյան պալատում նեղ կազմով ընթանում է Ֆրանսիայի պաշտպանության և ազգային անվտանգության հարցերով խորհրդի նիստը: Ինչպես հայտնել է Ֆրանսիայի նախագահ Էմանուել Մակրոնի վարչակազմի աղբյուրը, խորհրդակցության գլխավոր թեման դարձել է Ուկրաինայի իրադրությունը:

«Նախագահ Մակրոնը երեկոյան պաշտպանության հարցերով խորհրդի նիստ է հրավիրել, որպեսզի քննարկի Ուկրաինայի իրադրությունը», – նշել են Ելիսեյան պալատում: Այստեղ նաև նշել են, որ Ֆրանսիայի առաջնորդը երկուշաբթի երեկոյան մի շարք հեռախոսային բանակցություններ է վարել, այդ թվում՝ Գերմանիայի կանցլեր Օլաֆ Շոլցի և Ուկրաինայի նախագահ Վլադիմիր Զելենսկու հետ: Այդ զրույցների բովանդակությունը չի բացահայտվում։

Ավելի վաղ Կրեմլի մամուլի ծառայությունը տեղեկացրել էր, որ ՌԴ նախագահ Վլադիմիր Պուտինը հեռախոսազրույցներ է ունեցել Մակրոնի և Շոլցի հետ: Նրանց հետ շփումներում Ռուսաստանի ղեկավարը հայտնել է, որ մոտ ժամանակներս մտադիր է ստորագրել Դոնեցկի և Լուգանսկի ժողովրդական հանրապետությունները ճանաչելու մասին հրամանագիրը: