Ադրբեջանի նախագահ Իլհամ Ալիևը Անկարայում հանդիպում է ունեցել Թուրքիայի նախագահ Ռեջեփ Թայիփ Էրդողանի հետ: Կողմերը քննարկել են երկկողմ համագործակցությունը, Ադրբեջանի և Հայաստանի միջև հարաբերությունների կարգավորման հեռանկարները, ինչպես նաև Ուկրաինայի իրադրությունը: Այս մասին հաղորդում է Ադրբեջանի նախագահի պաշտոնական կայքը: 

«Ալիևն ու Էրդողանը կարևորել են Զանգեզուրի միջանցքի բացումը, նրա հեռանկարները, որոնք նա ստեղծում է տարածաշրջանի համար, և այդ կապակցությամբ Կարս-Նախիջևան երկաթուղու կառուցումը», – նշվում է հաղորդագրության մեջ: 

Նախագահներն ընդգծել են Հայաստանի կողմից 2020 թվականի նոյեմբերի 10-ին ստորագրված եռակողմ հայտարարության բոլոր դրույթների կատարման կարևորությունը և քննարկել թուրքական և հայկական պատվիրակությունների միջև շփումները: