Շուշի-Քարին տակ խաչմերուկի հատվածում քաղաքացիական հագուստներով մի խումբ ադրբեջանցիներ բնապահպանական պատճառաբանությամբ փակել են Ստեփանակերտ-Գորիս մայրուղին, այդկերպ փակելով Արցախը Հայաստանին կապող միակ ճանապարհը։   ԲՀԿ քաղխորհրդի անդամ Արման Աբովյանը ֆեյսբուքի իր էջում անդրադարձել թեմային, և գրել․ «Վաղը չզարմանաք, երբ նույն «բնապահպանները» կփակեն Տավուշի կամ Երասխի ճանապարհները։ Իսկ մենք շարունակենք քննարկել տոնածառի բարձրությունը և տնտեսության զարգացումը։ Ապագա Կա՛»։

Այս առնչությամբ Tert.am-ը զրուցեց Արման Աբովյանի հետ, հարցնելով, թե ինչո՞ւ է այս հարցին անդրադառնում ԲՀԿ–ն, իսկ մյուս հարցերում լուռ է, և չի մասնակցում հակաիշխանական գործողություններին, ընդդիմության նախաձեռնություններին, Արման Աբովյանն ասաց․ «Պետք չէ ստեղծել տպավորություն, որ ԲՀԿ-ն լուռ է, քանզի ես, ով ԲՀԿ քաղխորհդրի անդամ է, գոնե ամեն օր այս կամ այն հարթակներում բարձրաձայնում եմ դրա մասին։ ԲՀԿ-ն եղել է, կա և մնում է պրոհայկական, պրոարցախյան ուժ, մեզ համար կարևորագույնը Հայաստանի և Արցախի անվտանգությունն ու զարգացումն է, իսկ մեզ այս կամ այն դաշտ մտցնելու փորձեր թող չանեն»։

Ինչ վերաբերում է Արցախը Հայաստանին կապող միակ ճանապարհը փակելուն, Արման Աբովյանն ասաց․ «Սա ակնհայտորեն մտածված սադրանք է թուրք-ադրբեջանական տեռորիստական ուժերի կողմից։ Քաղաքացիական հագուստ հագցնելով իրենց հատուկջոկատայիններին և փակելով ճանապարհը՝ իրենց լուծում են միանգամից  մի քանի հարցեր։ Առաջին՝ իրենք պահանջելու են անցակետի տեղադրում այդ հատվածում, քանզի Ադրբեջանը մշտապես մեղադրում է ռուսական կողմին, որ պրոհայկական դիրքերում են հանդես գալիս, դրանով ցանկանում են Արցախի գոյության կոճակը պահել իրենց ձեռքում։ Երկրորդ՝ փորձում են արցախահայության շրջանում ստեղծել նյարդային խուճապ՝ ստիպելով, որ արցախահայերը դուրս գան Արցախից։ Երրորդ՝ ադրբեջանցիները սրանով փորձելու են Բերձորի միջանցքը դարձնել խաղաքարտ Սյունիքի  կամ ինչպես իրենք են ասում «Զանգեզուրի միջանցքի» հետ կապված։ Եվ քանի, որ իրենք խնդիր ունեն մաքսիմալ վարկաբեկել ռուս խաղաղապահների գործունեությունը՝ առաջացնելով հակառուսական տրամադրություններ Արցախում և Հայաստանում, հող են նախապատրաստելու ռուս խաղաղապահների դուրսբերման համար»,- ասաց Արման Աբովյանը։

Նրա խոսքով քաղաքացիական հագուստ հագցնելով իրենց զինվորներին՝ Ադրբեջանը լեգիտիմ հիմքեր է ստեղծում՝ իր քաղաքացիներին պաշտպանելու պատրվակով ուժ կիրառելու համար։

«Այս իշխանությունները շատ վաղուց կամովին, ադրբեջանամետ խաղաղության  դարաշրջանի շրջանակներում, զրկել են այս ամենին ինչ-որ կերպ միջամտելու իրավական բոլոր հիքմերից։ «Մեռան» Ադրբեջանի շինծու տարածքային ամբողջականության մասին ամեն պատի տակ գոռալով»,- ասաց Արման Աբովյանը։