ՔՊ-ական պատգամավոր Ռուստամ Բաքոյանն այսօր ԱԺ-ում Նիկոլ Փաշինյանին դիմելով, ասաց, որ Հայաստանում շարունակվում են համայնքային խոշորացումները։

Նա նշեց, որ թե՛ խոշորացված, թե՛ չխոշորացված համայնքներն ունեն բյուջեի սղության խնդիր։ Նա նկատեց, որ խնդիրն էլ ավելի բարդ է ազգային փոքրամասնությունների համայնքներում։ Պատգամավորը հետաքրքրվեց, թե այս առումով կառավարությունն ի՞նչ ծրագրեր է նախատեսում իրականացնել ազգային փոքրամասնությունների համայնքներում։

Ի պատասխան՝ Նիկոլ Փաշինյանը նշեց, որ հարցին պատասխանելու համար նախ պետք է գալ նախապատմությունից։

«Ինչո՞ւ ազգային փոքրամասնությունների հոծ բնակությամբ համայնքների մի մասը չեն խոշորացել, քանի որ նրանք չեն ցանկացել, որ խոշորացում տեղի ունենա՝ դրա մեջ տեսնելով սպառնալիքներ իրենց բնականոն կյանքի համար։ Սա էն գլխից էլ գիտեինք, որ բերելու է որոշակի խնդիրների»,- ասաց Փաշինյանը։

Նրա խոսքով՝ խնդիրն այդտեղից է։ Ըստ Փաշինյանի՝ լայնածավալ ծրագրերն իրականացվում են համայնքների ներկայացրած ծրագրերի հիման վրա։

«Իսկ չխոշորացված համայքները հնարավորություն չունեն սուբվենցիոն ծրագրերից օգտվելու։ Երևի պետք է հասկանանք՝ ինչպես օգնել այդ համայնքներին»,- նկատեց նա։