ԱԺ-ում շարունակվում են 2021 թվականի բյուջեի նախագծի նախնական քննարկումները: ՀՀ փոխվարչապետ Մհեր Գրիգորյանն ասաց, որ երկրի գլխավոր ֆինանսական փաստաթուղթը պետք է արտացոլի կառավարության ծրագրում ամրագրված նպատակներին հասնելու ուղիները. «Շատ կարևոր է կենտրոնացնել բոլորիս ջանքերը 2021 թվականի պետական բյուջեի մասին օրենքի նախագծի քննարկման վրա, քանի որ այն պետք է արտացոլի կառավարության ծրագրում ամրագրված նպատակներին հասնելու հնարավոր ուղղությունները, ոլորտային քաղաքականությունների շեշտադրումները, ինչպես նաև ներկա իրավիճակով պայմանավորված նոր մարտահրավերները։ Երկրի երկարաժամկետ զարգացման և ոլորտային ռազմավարությունների վերանայման աշխատանքները սկսվել են դեռևսս 2018-ին, 2019-ին իրականացվել են ոլորտային և գլոբալ ռազմավարության բազմաթիվ ճշգրտումներ: Սերտորեն համագործակցելով Կենտրոնական բանկի հետ՝ դրամավարկային և հարկաբյուջետային քաղաքականությունների կոորդինացիայի արդյունքում, հնարավոր եղավ ապահովել կայուն մակրոմիջավայր թե՛ 2019-ին, թե՛ 2020-ին, որն աննախադեպ է՝ ինչպես համավարակի, այնպես էլ Թուրքիայի հովանավորչությամբ և մասնակցությամբ Ադրբեջանի սանձազերծած պատերազմի պայմաններում»,-ընդգծեց Գրիգորյանը: