Ծաղկի շուկայում գների որոշակի բարձրացում նկատել ենք, բայց մեր գործողություններից հետո գների նվազեցում է տեղի ունեցել: Այս մասին Ազգային ժողովում լրագրողների հետ զրույցում ասաց ՀՀ տնտեսական մրցակցության պաշտպանության հանձնաժողովի նախագահ Գեղամ Գևորգյանը:

«Սկզբում հորդոր է եղել, բայց հորդորը միգուցե մի փոքր թուլացրեց, բայց խնդիրն ամբողջական չլուծեց: Այնուհետև մեր գործընկերների հետ մենք մեծածախ վաճառքի իրականացնող ծաղկի շուկաներում մոնիտորինգ արեցինք և գների բարձրացում նկատեցինք, որի հետ կապված երկու գործողություն իրականացրեցինք: Նախ արտահանողներին խնդրեցինք շուկայում ծաղկի ներքին վաճառք իրականացնել, որը գներն անմիջականորեն զսպեց: Երկրորդ՝ պայմանավորվեցինք, որ գների նվազեցում տեղի կունենա, ինչը փաստացի տեղի է ունեցել»- հայտնեց նա:

Գեղամ Գևորգյանի խոսքով՝ ՏՄՊՊՀ-ն օրենքով սահմանված «դասական գործողությունները» չէր կարող իրականացնել տվյալ պարագայում, քանի որ խոսքը հազարավոր ջերմոցային տնտեսություններ մասին էր, որոնք օրենքի ուժով որևէ ձևաչափով կառույցի տիրույթում չեն:

Կորոնավիրուսի և պատերազմի հետևանքով ավելի շատ մահերից հետո քաղաքացիները ահազանգում էին ծաղկի շուկայում, մասնավորապես, ծաղկեպսակների դեպքում գների բարձրացման մասին:

ՏՄՊՊՀ նախագահը նաև հայտնեց, որ վերջին շրջանում որոշակի բարձրացել են տարբեր սննդամթերքների՝ ալյուրի, ձեթի գները. «Ձեթի գինն արդեն իջել է: Այս բարձրացումները կապված են թե սեզոնի, թե ներմուծման գների հետ և թե արտարժույթի փոխանակման կուրսի բարձրացման հետ: Եթե կան անհիմն թանկացումներ տնտեսվարողների կողմից, պատժում ենք»,- ասաց նա: