Այսօր մենք կանգնած ենք հայրենիք կորցնելու առաջ վտանգի առաջ, ինչը պետք է թույլ չտանք: Այս մասին կառվարության շենքի մոտ հայտարարեց «Բարգավաճ Հայաստան» խմբակցության պատգամավոր Միքայել Մելքումյանը:

«Այսօր քիչ ենք հավաքվել, շատ ենք հավաքվել կապ չունի, բոլորն են զգում, որ այն աշխատասենյակում նստածը, որը գրկել է այդ աթոռը, պետք է արագ հեռանա: Տևական ժամանակ խոսում ենք մեր սահմանային տարածքների կորստի մասին, մեր իշխանությունները, ըստ էության, չեն մասնակցում մեր երկրի սահմանների սահմանազատմանը և սահմանգծմանը, նրանք բացակա են»,- ասաց նա:

Մելքումյանի խոսքով՝ սրան զուգահեռ մի խայտառակ բան է կատարվում մեր երկրում: «Այսօր մենք տեսում ենք, որ տնտեսությունը գահավիժում է, դրամի փոխարժեքը գահավիժում է, չգիտենք՝ մեր ԿԲ-ի կենտրոնական պահուստները ռեալ որքան են, և չգիտենք, թե ժողովուրդն ինչքան է աղքատանում: Փետրվարի 1-ից էլեկտրաէրգիան 3 դրամով թանկանում է, դա բացատրվում է նրանով, որ 2020-ին և 2019-ին մենք ռուսական վարկը չենք կարողացել ճիշտ օգտագործել և կորցրել ենք ատոմակայանի վերազինման աշխատանքների հնարավորությունը: Այսպես երկար կարող ենք շարունակել. գնում ենք սոցիալական փլուզման ճանապարհով»,- հայտարարեց Մելքումյանը:

Նա հավելեց՝ չգիտի 1-2 ամիս հետո թոշակները, աշխավարձերը կարողանալո՞ւ են տալ, թե՝ չէ և ով պետք է պատասխան տա դրա համար: «Պետք է բոլորս ոտքի կանգնենք, գիտեմ՝ ձմեռ է, ցուրտ է, բայց մենք հայրենիք ենք կորցնում, պետք է բոլորով գանք այստեղ և վերջնական ճնշում գործադրենք այս հարցը անպայման լուծվելու է: Մեր ժողովուրդն իրար նայում են, ասում՝ բայց մի բան ստացվո՞ւմ է, արդեն ստացվել է դավաճանի խարանը մտած է, բոլորն էլ ասում են՝ դավաճանը պետք է հեռանա, նրա հրամանները չեն կատարվում»,- նշեց նա: