Միացյալ Նահանգների իշխանությունները «Ռուսաստանի ազդեցությանը հակազդելու» համար 290 մլն դոլար են հատկացրել։ Այս մասին ասված է 2021 ֆինանսական տարում կառավարության աշխատանքը ֆինանսավորելու մասին օրինագծերի փաթեթի փաստաթղթերից մեկում, որը նախօրեին հաստատել Է ԱՄՆ նախագահ Դոնալդ Թրամփը, փոխանցում է ՏԱՍՍ-ը։

Նշվում է, որ խոսքը, մասնավորապես, ԱՄՆ պետական բյուջեից ֆինանսավորվող «Ամերիկայի Ձայն» և «Ազատ Եվրոպա/Ազատություն» ռադիոկայանների աշխատանքի համար միջոցների հատկացման մասին է։

Փաստաթուղթը նաև արգելք է պարունակում «Ռուսաստանի Դաշնության կառավարության ռազմավարական նպատակներին հասնելուն նպաստող գործունեության ֆինանսավորման համար, որը, պետքարտուղարի կարծիքով, կարող է սպառնալ Միացյալ Նահանգների ազգային անվտանգության շահերին»:

Ընդ որում, «Չինաստանի ազդեցությանը հակազդելու» համար հատկացվել է 300 մլն դոլար։

Փաստաթղթերում հիշատակվում են նաև միջոցներ, որոնք նախատեսված են օգտագործել «Եվրոպայում, Եվրասիայում և Կենտրոնական Ասիայում իրավապահ մարմինների և անվտանգության ուժերի ունակությունների ամրապնդման և անվտանգության ոլորտում համագործակցության ամրապնդման ծրագրերի համար»։