Շուռնուխում լինելով, հարցն ուսումնասիրելով՝ ուղղակի կարող ես զարմանալ, թե ՀՀ-ից ով է բանակցում և ով տեղեկացված չէ, որ 1986 թվականին այդ 12 տների հարակից անտառապատ տարածքի փոխարեն տվել են մի 3 կմ ձախ գտնվող տարածքը, հիմա և՛ դա է Ադրբեջանի տարածքը և սա: Եթե բանակցող չկա, ասեք կամ ընդունեք, որ ունակ չեք բանակցելու, եթե չեք տիրապետում, ասեք, ձեզ սովորեցնենք: Այս մասին այսօր ԱԺ նիստի ժամանակ ասաց ԲՀԿ պատգամավոր Միքայել Մելքումյանը:

«Առհասարակ պատերազմները սկսվում են այն ժամանակ, երբ թշնամին համոզված է, որ հաղթելու է, այսինքն՝ նա ընտրում է պահը, ժամկետը և հակառակորդի թուլությունը և այդ թուլությունը առաջացել էր հետհեղափոխական Հայաստանում, այլ Հայաստանում նման բան չէր եղել: Այս պարագայում պարզվում է, որ հեղափոխություն անելով՝ դու պարտվում ես, և երբ մենք ասացինք, որ դուք ստում եք, թե տնտեսական հեղափոխություն կա, արդարության դեմ պայքարում եք, բաժանումներ եք անում թալանչիների, ազնիվների խմբերի, այս ամենը բերեց ազգային դիմադրողականության փլուզման»,-ասաց նա:

Միքայել Մելքումյանի խոսքով՝ երբ այս ամենի մասին բարձրաձայնում էր, ոչ ոք ձայն չէր հանում և ստացվում է, որ իշխանականները լռությամբ ընդունում էին, որ երկիրը կառավարել չեն կարողանում:

«Կառավարման դիմադրողականությունն ընկել է զրոյից ներքև, և երկիրը տանում եք վերջնական կոլապսային վիճակի: Այսօր մենք պետական պարտքը տարվա վերջին կհասցենք 73 տոկոսի համախառն ներքին արդյունքի նկատմամբ, թոշակ, աշխատավարձ չեք կարողանալու տալ, եվրոբոնդերն եք թողարկում, 2-3 ամիս էլ տաք, բա հետո ի՞նչ եք անելու: Այսօր երկիրը գնում է տոտալ աղքատացման, այսօր երկիրը կանգնած է անդունդի եզրին, և ես հավատում եմ, որ ժողովուրդը ոտքի կկանգնի, որ իրեն փրկի, ձեզ վրա այլևս հույս դնել չեն կարող»:

Մանրամասները՝ տեսանյութում։